ភ្នំពេញ ៖ បច្ចុប្បន្នអត្រាគ្របដណ្តប់អនាម័យជនបទបានកើនដល់ជាង ៧០% និងការផ្គត់ផ្គង់ទឹកជនបទបានកើនដល់ជាង ៦០% ហើយប្រទេសកម្ពុជា ជាប្រទេសជាប់ចំណាត់ថ្នាក់លេខ ២ ដែលបានកាត់បន្ថយអត្រាអ្នកបន្ទោរបង់ពាសវាពាលកាល គិតពីឆ្នាំ២០០០ ដល់ឆ្នាំ២០១៧។
ទស្សនវិស័យ និងគោលដៅរបស់រាជរដ្ឋាភិបាល បានកំណត់ថា៖ នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទត្រូវមានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្ដរភាព ។
នេះជាការលើកឡើងរបស់ លោកបណ្ឌិត អ៊ុក រ៉ាប៊ុន រដ្ឋមន្ដ្រីក្រសួងអភិវឌ្ឍន៍ជនបទ ក្នុងឱកាសដែលលោកអញ្ជើញជាអធិបតីក្នុងទិវាជាតិលើកកម្ពស់អនាម័យជនបទលើកទី ១០ ឆ្នាំ២០១៩ នៅវិទ្យាស្ថាបបច្ចេកវិទ្យាកម្ពុជា រាជធានីភ្នំពេញនាព្រឹកថ្ងៃទី២៦ ខែវិច្ឆិកា ឆ្នាំ២០១៩ ។
បន្ទាប់ពីចំណាប់អារម្មណ៍របស់លោក ជ្រាយ ប៉ុម អគ្គនាយកបច្ចេកទេសនៃក្រសួងអភិវឌ្ឍន៍ជនបទ និងលោកស្រី Cristian Munduateប្រធានអង្គការUNICEFប្រចាំនៅកម្ពុជា រួចមកលោក ទ្រី មេង រដ្ឋលេខាធិការ បានអាននូវសារលិខិតរបស់ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក្នុងឱកាសអបអរសាទរទិវាជាតិលើកកម្ពស់អនាម័យជនបទលើកទី១០ ឆ្នាំ២០១៩ ដែលបានផ្ដល់នូវអនុសាសន៍ទាំង ៥ ចំណុចសំខាន់ៗសំដៅឲ្យគ្រប់ភាគីពាក់ព័ន្ធទាំងអស់ម្រុញល្បឿននៃការអនុវត្តកម្មវិធីលើកកម្ពស់អនាម័យស្របតាមដែនសមត្ថកិច្ចរបស់ខ្លួន ដោយកៀរគរធនធាន និងធ្វើកិច្ចសហប្រតិបត្តិការជាមួយដៃគូរអភិវឌ្ឍ អង្គការមិនមែនរដ្ឋាភិបាល និងវិស័យឯកជន។
លោកបណ្ឌិត អ៊ុក រ៉ាប៊ុន មានប្រាសសន៍ថា៖ក្រសួងអភិវឌ្ឍន៍ជនបទទទួលបន្ទុកដឹកនាំ បង្កើត និងអនុវត្តកម្មវិធីអភិវឌ្ឍន៍ ទាំងរូបវ័ន្ត និងអរូបវ័ន្ត ដើម្បីលើកកម្ពស់សុខមាលភាព និងជីវភាពរស់នៅរបស់ប្រជាពលរដ្ឋនៅជនបទ។ ជាមោទនភាពណាស់ ដែលយើងបានអនុវត្តនូវផែនការសកម្មភាពជាតិស្តីពីការផ្តត់ផ្គង់ទឹកស្អាត និងការលើកកម្ពស់អនាម័យជនបទចំហានទី១ ឆ្នាំ២០១៤-២០១៨ បានយ៉ាងជោគជ័យ ពោលគឺលើសគោលដៅដែលបានកំណត់ (៦០% នៅឆ្នាំ ២០១៨)។ អត្រាគ្របដណ្តប់អនាម័យជនបទ បានកើនពី ៤០,៩ % នៅឆ្នាំ ២០១៣ ដល់ ៧១,២ % នៅឆ្នាំ២០១៧ ដែលធ្វើឱ្យប្រជាពលរដ្ឋប្រមាណ ៤ លាននាក់ ឬ ៩០៩ ០៩០ គ្រួសារ/ខ្នងផ្ទះ ទទួលបានអនាម័យដែលមានការកែលម្អ។ ដោយឡែកការផ្គត់ផ្គង់ទឹកជនបទ បានកើន ពី ៤៦,៦ % នៅឆ្នាំ២០១៣ ដល់ ៥៨,៧ % ក្នុងឆ្នាំ ២០១៧ ដោយបានធ្វើឱ្យប្រជាពលរដ្ឋប្រមាណ ១,៥៩ លាននាក់ ឬ ៣៦១ ៣៦៤ គ្រួសារ/ខ្នងផ្ទះ ទទួលបានទឹកស្អាតដែលមានការកែលម្អ។ បច្ចុប្បន្នអត្រាគ្របដណ្តប់អនាម័យជនបទបានកើនដល់ជាង ៧០% និងការផ្គត់ផ្គង់ទឹកជនបទបានកើនដល់ជាង ៦០%ផងដែរ។ ប្រទេសកម្ពុជា ជាប្រទេសជាប់ចំណាត់ថ្នាក់លេខ ២ ដែលបានកាត់បន្ថយអត្រាអ្នកបន្ទោរបង់ពាសវាពាលកាល គិតពីឆ្នាំ២០០០ ដល់ឆ្នាំ២០១៧។
ឯកឧត្ដម បានបន្តថា៖ផែនការសកម្មភាពជាតិជំហានទី២ ស្តីពីការផ្គត់ផ្គង់ទឹក ការសំអាត និងអនាម័យជនបទសម្រាប់ឆ្នាំ២០១៩–២០២៣ បានកំណត់គោលដៅ ៩០% នៃប្រជាពលរដ្ឋនៅតំបន់ជនបទ នឹងទទួលបានសេវាទឹកស្អាត និងអនាម័យប្រកបដោយសមធម៌ សុវត្ថិភាព និងតម្លៃសមរម្យ។ ក្រសួងអភិវឌ្ឍន៍ជនបទ ដោយមានការចូលរួមពីភាគីពាក់ព័ន្ធដោយបានផ្សារភ្ជាប់គោលនយោបាយជាតិស្តីពីការផ្គត់ផ្គង់ទឹកស្អាត និងលើកកម្ពស់អនាម័យ ឆ្នាំ២០០៣ ផែនការយុទ្ធសាស្ត្រជាតិ ស្តីពីការផ្គត់ផ្គង់ទឹកស្អាត និងលើកកម្ពស់អនាម័យនៅជនបទឆ្នាំ២០១៤-២០២៥ និងផែនការយុទ្ធសាស្ត្រអភិវឌ្ឍន៍ជនបទរបស់ក្រសួងអភិវឌ្ឍន៍ជនបទ ឆ្នាំ២០១៩-២០២៣ ក៏ដូចជាការផ្សារភ្ជាប់ជាមួយយុទ្ធសាស្ត្រចតុកោណដំណាក់កាលទី៤ លើការអភិវឌ្ឍបរិយាប័ន និងប្រកបដោយចីរភាព។ដោយឡែកខេត្តស្វាយរៀងកែប,កំពង់ស្ពឺ និងខេត្តកំពង់ឆ្នាំង ជាខេត្តគោលដៅនៃការបញ្ឈប់ការបន្ទោរបង់ពាសវាលពាសកាល នៅឆ្នាំ២០២៣ ។
ឯកឧត្ដមរដ្ឋមន្ដ្រីបានអំពាវនាវឲ្យរដ្ឋបាលថ្នាក់ក្រោមជាតិបន្តជម្រុញស្ថានភាពអនាម័យនៅក្នុងមូលដ្ឋានរបស់ខ្លួនឲ្យកាន់តែល្អប្រសើរឡើងដោយសហប្រតិបត្តិការជាមួយក្រសួងអភិវឌ្ឍន៍ជនបទ បន្តបេសកម្មលើវិស័យផ្គត់ផ្គង់ទឹកស្អាត ការសំអាត និងអនាម័យជនបទ ដើម្បីឈានទៅសម្រេចឲ្យបាននូវទស្សនៈវិស័យរបស់រាជរដ្ឋាភិបា ដែលបានកំណត់ថា៖ នៅឆ្នាំ២០២៥ ប្រជាពលរដ្ឋគ្រប់រូបនៅសហគមន៍ជនបទត្រូវមានសេវាផ្គត់ផ្គង់ទឹកស្អាត និងអនាម័យគ្រប់គ្រាន់ ព្រមទាំងរស់នៅក្នុងបរិស្ថានដែលមានអនាម័យប្រកបដោយនិរន្ដរភាព។
កញ្ញា វ៉ាត
