ដំណាំបន្លែចម្រុះមានត្រកួន សណ្តែក ស្ពៃជាដើមដែលកសិករយើងនិយមដាំក្រៅពីនោះកសិករយើងឃុំរការខ្ពស់ ខេត្តកណ្តាលតែងនិយមដាំបន្លែផ្ទីដែលពុំសូវនរណាចាប់អារម្មណ៍នោះឡើយព្រោះជាបន្លែបន្ទាប់បន្សំ ក៏ប៉ុន្តែពេលបានផលជួយដល់ការរកចំណូលដល់កសិករយើងដោយសារតែបន្លែផ្ទីដាំក្នុងរយៈពេលខ្លីពេលបានផលលក់រាល់ថ្ងៃ។
បើតាមបងស្រី អួន ជាកសិករក្នុងឃុំរការខ្ពស់ដែលដាំផ្ទីនេះជារៀងរាល់ឆ្នាំបានឲ្យដឹងថាកសិករយើងក្នុងឃុំនេះភាគច្រើនដាំផ្ទៃដូចៗគ្នា ដោយប្រើរយៈពេលតែ១ខែបានផល ។ បន្លែផ្ទីក៏ត្រូវការជី និងថ្នាំសម្លាប់សត្វល្អិតផងដែរ។ប្រភេទផ្ទីមានឈ្មោះផ្ទីដូង ផ្ទីអាចម៍មាន់និងផ្ទីបន្លាដើម្បីតម្រូវការទីផ្សារប្រជាកសិករយើងត្រូវការដាំតែពូជផ្ទីដូងប៉ុណ្ណោះ ចំណែកពូជផ្ទី២ទៀតកម្រមានអ្នកដាំណាស់ ភាគច្រើនប្រភេទផ្ទីនេះច្រើនតែដុះឯងតាមរបងផ្ទះ ឬនៅដើមភ្លឺស្រែ។
បងស្រីបន្តថាមុខរបរដាំផ្ទីនេះអាចដាំបាន២ទៅ៣ដងក្នុង១ឆ្នាំ ហើយប្រភេទផ្ទីដូងអាចលក់លើទីផ្សារបានថ្លៃ១គីឡូក្រាមបានថ្លៃ៧០០ទៅ១០០០រៀលហើយអាចច្រូតប្រមូលផលបានក្នុង១ថ្ងៃៗ៥០គីឡូក្រាម ។ បន្លែផ្ទីជាប្រភេទបន្លែបៃតងមានរសជាតិផ្អែមតិចៗដែលធ្វើឲ្យអ្នកទទួលទានត្រជាក់ខ្លួន៕
