តាកែវ ៖ លោកបណ្ឌិត អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានអញ្ជើញជាអធិបតីក្នុងពិធីបើកការដ្ឋានសាងសង់ផ្លូវលំជនបទក្នុងក្របខ័ណ្ឌគម្រោងសាច់ប្រាក់ពលកម្មសម្រាប់អភិវឌ្ឍន៍ជនបទ និងគាំទ្រកសិករ កាលពីថ្ងៃទី១០ ខែមិថុនា ឆ្នាំ២០២០ នៅភូមិព្រៃឈើទាល ឃុំតាភេម ស្រុកត្រាំកក់ ខេត្តតាកែវ។
លោកម អ៊ូច ភា អភិបាលនៃគណៈអភិបាលខេត្តតាកែវ បានសម្ដែងការស្វាគមន៍ចំពោះវត្តមានគម្រោងសាច់ប្រាក់ពលកម្មសម្រាប់អភិវឌ្ឍន៍ជនបទ និងគាំទ្រកសិកររបស់ក្រសួងអភិវឌ្ឍន៍ជនបទ ក្នុងការស្ថាបនាផ្លូវដីសដោយប្រើប្រាស់កម្លាំងពលកម្មរបស់បងប្អូនប្រជាពលរដ្ឋ។នៅឆ្នាំ២០២០ ស្រុកត្រាំកក់នឹងទទួលបានផ្លូវដីក្នុងភូមិសប្រមាណ ជាង ១៣គីឡូម៉ែត្រ នៅក្នុងឃុំទាំង ៦ គឺឃុំតាភេម ត្រពាំងធំខាងជើង ត្រពាំងក្រញូង ជាងទង អូរសារាយ និងឃុំសំរោង ។
លោកបណ្ឌិត អ៊ុក រ៉ាប៊ុន បានវាយតម្លៃខ្ពស់ចំពោះសមិទ្ធផលជាច្រើនដែលបានកើតមានឡើងក្នុងខេត្តតាកែវ ជាពិសេសគឺហេដ្ឋារចនាសម្ព័ន្ធមានផ្លូវជាតិលេខ ៣ និងផ្លូវជាតិលេខ ២ បង្ហាញពីការយកចិត្តទុកដាក់របស់ប្រមុខរាជរដ្ឋាភិបាលដែលមានសម្ដេចតេជោ នាយករដ្ឋមន្ដ្រី ។ក្រៅពីទទួលបានផ្លូវជាតិ សម្ដេចតេទោនាយករដ្ឋមន្ដ្រីក៏បានគិតគូអំពីផ្លូវលំជនបទ ដែលផ្លូវនេះមានសារសំខាន់ណាស់សម្រាប់តភ្ជាប់ពីភូមិំយួយទៅភូមិមួយទៀតងាយស្រួលដល់ប្រជាពលរដ្ឋក្នុងការធ្វើដំណើរឆ្លងកាត់ជាប្រចាំ។
លោក បានបន្តថា គម្រោងសាច់ប្រាក់ពលកម្មសម្រាប់អភិវឌ្ឍន៍ហេដ្ឋារចនាសម្ព័ន្ធជនបទ និងការគាំទ្រកសិករ ជាគម្រោងដែលទទួលហិរញ្ញប្បទានផ្ទាល់រាជរដ្ឋាភិបាលក្នុងគោលបំណងចូលរួមកាត់បន្ថយភាពក្រីក្រ និងលើកកម្ពស់សុខមាលភាពរបស់ប្រជាពលរដ្ឋដែលធ្វើឡើងតាមរយៈផ្ដល់ឱកាសការងាររយៈកម្មវិធីសាច់ប្រាក់ពលកម្មដែលជួយដោះស្រាយជីវភាពបន្ទាន់ដល់ប្រជាពលរដ្ឋជាពិសេសកម្មករ កម្មកានី ដែលត្រូវបានព្យួរការងារតាមរោងចក្រដោយសារតែរងផលប៉ះពាល់ជំងឺកូវីដ ១៩ ។ការងារពលកម្មដើម្បីស្ថាបនាផ្លូវដីស ជាគម្រោងរបស់រាជរដ្ឋាភិបាលដើម្បីអភិវឌ្ឍន៍ហេដ្ឋារចនាសម្ព័ន្ធក្នុងភូមិ តែការងារពលកម្មនេះមិនមែនជាការកំណែននោះទេ ជាការស្ម័គ្រចិត្ត ។ដោយឡែកការក្រាលក្រួសក្រហមរាជរដ្ឋាភិបាលនឹងប្រើប្រាស់គ្រឿងចក្រដើម្បីបង្ហាប់ប្រកបដោយគុណភាព។
លោកបណ្ឌិតរដ្ឋមន្ដ្រី បានរំលឹកឲ្យប្រជាពលរដ្ឋចូលរួមជាមួយរាជរដ្ឋាភិបាលដើម្បីទទួលបានផ្លូវប្រើប្រាស់ក្នុងភូមិផង និងទទួលបានកម្រៃសម្រាប់ទ្រទ្រង់ជីវភាពផង ដោយតម្លៃក្នុង ១ម៉ែត្រត្រីគុណទទួលបានថវិកា ១២ ០០០ រៀល និងការដាំស្មៅតាមជើងទេរក្នុង១ ម៉ែត្រការ៉េទទួលបាន ៣ ០០០ រៀល ។
ជាមួយនេះលោកបណ្ឌិតរដ្ឋមន្ដ្រីក្រសួងអភិវឌ្ឍន៍ជនបទ បានរំលឹកឲ្យប្រជាពលរដ្ឋចូលរួមទប់ស្កាត់ការរីករាលដាលជំងឺកូវីដ ១៩ ដោយឧស្សាហ៍ដុសលាងសម្អាតដៃជាមួយសាប៊ូ ជែល ឬអាល់កុល ពាក់ម៉ាស់ និងរក្សាគម្លាតតាមការណែនាំរបស់ក្រសួងសុខាភិបាល ។
តមកគណៈប្រតិភូបានអញ្ជើញទៅពិនិត្យមើលសកម្មភាពស្ថាបនាផ្លូវដីសរបស់ប្រជាពលរដ្ឋនៅភូមិព្រៃឈើទាល ឃុំតាភេម ស្រុកត្រាំកក់ ខេត្តតាកែវ ។
សូមបញ្ជាក់ថា គម្រោងសាច់ប្រាក់ពលកម្មសម្រាប់អភិវឌ្ឍន៍ជនបទ និងគាំទ្រកសិករ បានអនុវត្តនៅក្នុខេត្តគោលដៅចំនួន ១៧ គឺខេត្តកំពង់ឆ្នាំង កំពង់ធំ កំពង់ស្ពឺ តាកែវ បាត់ដំបង ពោធិ៍សាត់ ព្រៃវែង សៀមរាប ស្វាយរៀង ឧត្ដរមានជ័យ កណ្ដាល បន្ទាយមានជ័យ កំពត ក្រចេះ ស្ទឹងត្រែង ត្បូងឃ្មុំ និងខេត្តព្រះវិហារ ៕ កញ្ញា វ៉ាត
