កណ្តាល៖ ដំណាំចេកជាដំណាំយុទ្ធសាស្ត្រមួយយូរអង្វែងដែលប្រជាពលរដ្ឋយើងតែងដាំលក់ក្នុងស្រុកជាលក្ខណៈគ្រួសារ។ដោយឡែកចំពោះអ្នកភាគកណ្តាលនិយមដាំចេកពងមាន់ភាគច្រើនជាងដាំចេកណាំវ៉ាមកពីកត្តាច្រើនដែលប្រជាពលរដ្ឋដាំប្រភេទចេកនេះក៏ដោយសារតែតម្លៃទីផ្សារប្រភេទចេកទាំងពីរនេះមានតម្លៃខុសគ្នាឆ្ងាយ តែក៏មានអ្នកនិយមដាំចេកណាំវ៉ាជាលក្ខណៈគ្រួសារដែរ។
កសិករឈ្មោះ ធី រស់នៅក្នុងភូមិខ្ពបវែង សង្កាត់កំពង់សំណាញ់ ក្រុងតាខៅ្ម ខេត្តកណ្តាលបានរៀបរាប់ពីការដាំចេកណាំវ៉ាថា ចេកដែលដាំទាំងនេះលើផ្ទៃដីក្បាល២០ម៉ែត្រ បណ្តោយ១៥០ម៉ែត្រ ដោយដាំឃ្លាតចន្លោះពីគ្នា៣ទៅ៤ម៉ែត្រ។
លោក ធី បន្តថាដំណាំចេកនេះក្នុងខេត្តកណ្តាលដាំតិចតួចតែបើចេកពងមាន់មានដាំច្រើនអាស្រ័យដោយសារតែចេកនេះបានថ្លៃខ្ពស់ក្នុងទីផ្សារ ម្យ៉ាងទៀតចេកពងមាន់អាចដាំតម្រូវទៅតាមថ្ងៃចូលឆ្នាំចិនបានថ្លៃណាស់ដោយក្នុង១ស្ទងមានតម្លៃចាប់ពី៤ម៉ឺនទៅ៦ម៉ឺនរៀល ម្ល៉ោះហើយចេកពងមាន់មានការដាំដុះច្រើនដោយចំពោះចេកណាំវ៉ាពុំសូវសំបូរច្រើននាំចូលពីខេត្តដទៃ។
លោក ធី បន្តទៀតថា ត្បិតតែចេកណាំវ៉ាមិនបានថ្លៃក៏ដោយក៏រូបលោកដាំបន្តជិត១០ឆ្នាំមកហើយ ។ ចេកណាំវ៉ាផ្តល់ប្រយោជន៍ដល់អ្នកដាំទាំងស្លឹកទាំងដើមទាំងផ្លែទាំងត្រយ៉ូងចេកផងដែរ ។ បច្ចុប្បន្នចេកណាំវ៉ាអាចលក់បាន១ស្និត២ពាន់ទៅ៣ពាន់រៀល ហើយចេកណាំវ៉ាដែលលោក ធីដាំនេះអាចលក់បានក្នុង១អាទិត្យបាន៧ម៉ឺនទៅ៨ម៉ឺនរៀល ។ ចាប់តាំងពីដាំចេកនេះមកបានធ្វើឲ្យជីវភាពគ្រួសារលោក ធី ធូរធារច្រើន៕
