វត្ថុធាតុដើមពីកំប្លោកបានផ្តល់អត្ថប្រយោជន៍ច្រើនដល់សិប្បករយើងក្នុងស្រុកយកមកកែច្នៃធ្វើជាគ្រឿងសង្ហារឹមដូចជាតុ កៅអីជាដើម ពិសេសថ្មីៗនេះសិប្បករក្នុងខេត្តសៀមរាបបានយកកំប្លោកមកកែច្នៃជាកាបូបយួរដៃនិងមួកបានយ៉ាងស្រស់ស្អាតនិងទទួលបានតម្លៃខ្ពស់ទៀតផង។
អ្នកភូមិដែលរស់នៅក្នុងក្រុងសៀមរាបមានជំនាញអាចត្បាញចាក់ រចនាទៅជាកាបូបយួរដៃអស់រយៈពេល៣ឆ្នាំមកហើយ។នេះបើតាមការលើកឡើងរបស់បងស្រី សាម៉ុន ដែលរស់នៅក្រុងសៀមរាបជាអ្នកផ្តើមមុខរបរនេះដោយឲ្យសិប្បករវ័យចាស់ៗមកត្បាញចាក់បង្កើតជាកាបូបទាំងនោះដោយធ្វើការកែច្នៃចេញមកពីកំប្លោកដោយប្រើរយៈពេលយូរថ្ងៃក្នុងការផលិតប្រើពេល៥ថ្ងៃទៅ១អាទិត្យទើបអាចផលិតបានកាបូបយួរដៃមួយ។
បងស្រី សាម៉ុន បន្តថាបើកាបូបមួយអាចមានការកែច្នៃដោយរចនាដាក់ផ្កាជ័រច្រើនអាចលក់ក្នុងតម្លៃថ្លៃ៥០ដុល្លារ តែបើការរចនាប្រើប្រាស់ផ្កាជ័រតិចអាចមានតម្លៃ៤០ដុល្លារឬ៣០ដុល្លារចុះ ចំណែកមួកវិញបានកែច្នៃពីក្រចៅនិងកប្បាសនិងរចនាដោយផ្កាជ័រដដែលមានតម្លៃ២០ដុល្លារ។
ដោយឡែកចំពោះសិប្បករវ័យចំណាស់ដែលជាអ្នកផលិតបានផ្តល់នូវកម្រៃក្នុងកាបូបមួយៗចាប់ពី១០ទៅ១៥ដុល្លារពីព្រោះការចំណាយសព្វសារពើនៅលើអ្នកគ្រប់គ្រងជាលក្ខណៈគ្រួសារពុំមែនជាលក្ខណៈសិប្បកម្មនោះឡើយ ។
បងស្រី សាម៉ុនបន្តទៀតថាកាបូបយួរដៃនេះមានទ្រនាប់ខាងក្នុងធម្មតាអាចប្រើប្រាស់បានយូរឆ្នាំបើមិនត្រូវទឹកដោយសារតែកាបូបនេះបានបាញ់ថ្នាំការពារផ្សិតជាមុនស្រេចទៅហើយ។ចំពោះទីផ្សារផលិតផលមួយនេះមានគ្រប់់២៥ខេត្តក្រុងហើយអតិថិជនអាចកម្ម៉ង់ឲ្យចាក់ម៉ូតកាបូបគ្រប់មុខទៅតាមតម្រូវការអ្នកប្រើប្រាស់ផងដែរ៕
