ក្នុងជំនួបសម្ដែងការគួរសម និងពិភាក្សាការងារជាមួយលោក Will Praks ប្រធានអង្គការមូលនិធិអង្គការសហប្រជាជាតិសម្រាប់កុមារ (UNICEF) ប្រចាំនៅព្រះរាជាណាចក្រកម្ពុជា នាព្រឹកថ្ងៃទី០២ ខែមីនា ឆ្នាំ២០២ នៅទីស្ដីការក្រសួង ឯកឧត្ដមបណ្ឌិតសភាចារ្យ អ៊ុក រ៉ាប៊ុន រដ្ឋមន្ដ្រីក្រសួងអភិវឌ្ឍន៍ជនបទ មានប្រសាសន៍ថា៖ អង្គការ UNICEF ជាដៃគូរដ៏សំខាន់របស់រាជរដ្ឋាភិបាល និងជាដៃគូចំបងជាមួយក្រសួងអភិវឌ្ឍន៍សម្រាប់អភិវឌ្ឍន៍វិស័យផ្គត់ផ្គង់ទឹកស្អាត និងអនាម័យជនបទនៅកម្ពុជា ។
ឯកឧត្ដមបណ្ឌិតសភាចារ្យ រដ្ឋមន្ដ្រី បានសម្ដែងការស្វាគមន៍ចំពោះលោក Will Praks ដែលបានទទួលតំណែងជាប្រធានអង្គការមូលនិធិអង្គការសហប្រជាជាតិសម្រាប់កុមារ (UNICEF) ប្រចាំនៅព្រះរាជាណាចក្រកម្ពុជា និងបានថ្លែងអំណរគុណ UNICEF ក្នុងកិច្ចសហប្រតិបត្តិការជាមួយក្រសួងអភិវឌ្ឍន៍ជនបទលើវិស័យផ្គត់ផ្គង់តឹកស្អាត និងអនាម័យជនបទឲ្យសម្រេចបានសមិទ្ធផលរួមគ្នា គឺការបញ្ចប់ការបន្ទោបង់ពាសវាលពាសកាល ODF នាពេលកន្លងមក ដូចជានៅខេត្តស្វាយរៀង ព្រៃវែង និងខេត្តកណ្ដាល ហើយនៅពេលឆាប់ៗខាងមុខនេះនឹងធ្វើពិធីប្រកាសជាផ្លូវការខេត្តកំពង់ស្ពឺ ជាខេត្តទី៤ បានបញ្ចប់ការបន្ទោបង់ពាសវាលពាសកាល ODF ។
ជាការឆ្លើយតបលោក Will Praks បានថ្លែងអំណរគុណចំពោះឯកឧត្ដមបណ្ឌិតសភាចារ្យ រដ្ឋមន្ត្រី ដែលបានផ្ដល់ឪកាសឲ្យរូបលោក និងសហការីបានចូលជួប សម្ដែងការគួរសម និងពិភាក្សាការងារនាពេលនេះ និងបានជម្រាបជូនថា លោកបានទទួលតំណែងជាប្រធានអង្គការមូលនិធិអង្គការសហប្រជាជាតិសម្រាប់កុមារ (UNICEF) ប្រចាំនៅព្រះរាជាណាចក្រកម្ពុជា បានរយៈបេល ១ឆ្នាំហើយ លោកយល់ថា ការងារអភិវឌ្ឍន៍ជនបទមានអាទិភាពណាស់ ហើយ UNICEF នឹងបន្តកិច្ចសហប្រតិបត្តិការជាមួយរាជរដ្ឋាភិបាល ជាពិសេសគឺក្រសួអអភិវឌ្ឍន៍ជនបទ ដើម្បីទួលបានសមិទ្ធផលថ្មីៗបន្ថែមទៀត ។
លោកបានបន្តថា UNICEF បាននឹងកំពុងគិតគូរដល់ភាពធន់ និងការប្រែប្រួលអាកាសធាតុទាក់ទិនទៅនឹងការអភិវឌ្ឍន៍វិស័យផ្គត់ផ្គង់ទឹកស្អាត និងអនាម័យជនបទនៅកម្ពុជា ។ ជាមួយគ្នានេះ UNICEF នឹងត្រួតពិនិត្យឡើងវិញនូវឯកសារគោលនយោបាយក៏ដូចជាផែនការយុទ្ធសាស្ដ្រជាតិ វិស័យផ្គត់ផ្គង់ទឹកស្អាត និងអនាម័យជនបទ ដើម្បីរួមគ្នាជម្រុញវិស័យនេះឲ្យកាន់តែមានប្រសិទ្ធភាព។ ភាគីទាំងពីរបានឯកភាពគ្នាថា នឹងបន្តកិច្ចសហប្រតិបត្តិការបន្តទៀត ជាមួយដៃគូរផ្សេងៗទៀត ដើម្បីធ្វើបច្ចុប្បន្នភាពលើគោលនយោបាយក៏ដូចជាផែនការសកម្មភាពជាតិ ជំហានទី៣ ខណៈជំហានទី២ នឹងត្រូវបានបញ្ចប់នៅឆ្នាំ២០២៣ នេះ ៕
