ការសិក្សាឲ្យដឹងពីធនាគារពិភពលោក(WB)បានបង្ហាញថាដើម្បីសម្រេចបានគោលដៅសហស្សវត្សទឹកស្អាតនិងអនាម័យត្រឹមឆ្នាំ 2030 កម្ពុជាត្រូវការធនធានមនុស្សដែលមានជំនាញនិងសមត្ថភាពប្រហែលជា១ម៉ឺនពីរពាន់នាក់ក្នុងមួយឆ្នាំដើម្បីចូលរួមដោះស្រាយលើវិស័យសំខាន់មួយនេះខណៈចំនួនធនធានមនុស្សកម្ពុជា បច្ចុប្បន្នមានប្រហែល 500 នាក់។
ការលើកឡើងរបស់លោក សៅ ដាវី នាយកប្រត្តិបត្តិ នៃអង្គការប្រើប្រាស់ទឹកប្រកបដោយចីរភាព (CSW)ក្នុងសិក្ខាសាលាមួយស្ដីពីការចូលរួមរបស់យុវជនដើម្បីពន្លឿនការសម្រេចបានគោលដៅអភិវឌ្ឍប្រកបដោយចីរភាពទី 6 លើវិស័យទឹកស្អាតនិងអនាម័យនៅកម្ពុជា។
លោកសៅដាវី នាយកប្រតិបត្តិនៃអង្គការប្រើប្រាស់ទឹកប្រកបដោយចីរភាព (CSW)បានលើកឡើងទៀតថាកម្ពុជាអាចសម្រេចបានគោលដៅអភិវឌ្ឍប្រកបដោយចីរភាពទី6(SDG6)លើវិស័យទឹកស្អាតនិងអនាម័យចាំបាច់ត្រូវការយុវជនដែលមានថាមពលចូលរួមអនុវត្តការងារ។ស្របគ្នានេះយុវជនត្រូវការចំណេះដឹងនិងការកសាងសមត្ថភាពដើម្បីចូលរួមកិច្ចការទឹកស្អាតនិងអនាម័យជាបន្តបន្ទាប់។អង្គការប្រើប្រាស់ទឹកប្រកបដោយចីរភាពមានបេសកកម្មបណ្ដុះបណ្ដាលសមត្ថភាពយុវជនឲ្យក្លាយជាធនធានមនុស្សដើម្បីដោះស្រាយបញ្ហាទឹកស្អាតនិងអនាម័យ(WASH)។
លោកបន្ថែមទៀតថាការចូលរួមរបស់យុវជនដើម្បីពន្លឿនការសម្រេចបានគោលដៅអភិវឌ្ឍប្រកបដោយចីរភាពទី 6 លើវិស័យទឹកស្អាតនិងអនាម័យនៅកម្ពុជាបានធ្វើឡើងក្នុងគោលបំនងឲ្យយុវជនដែលធ្វើការលើវិស័យនានា ឱ្យមានឱកាសកសាងបណ្ដាញនិងទំនាក់ទំនងរវាងពួកគេជាមួយវិស័យទឹកស្អាតនិងអនាម័យ។ពិភាក្សាអំពីគោលដៅទៅខាងមុខនិងផែនការរួមណាមួយ ដើម្បីរួមចំណែកក្នុងការសម្រេចគោលដៅទឹកស្អាតនិងអនាម័យសម្រាប់ទាំងអស់គ្នាក៏ដូចជាឆ្លើយតបទៅនឹងភាពធន់និងអាកាសធាតុ។
គួររំលឹកឡើងវិញថាជារឿយៗតំណាងអង្គការអភិវឌ្ឍន៍វិស័យទឹកស្អាតកម្ពុជាតែងលើកឡើងថាដើម្បីសម្រេចគោលដៅប្រកបដោយចីរភាពទី 6 យុវជនជាតួអង្គមានសក្តានុពលដ៏សំខាន់។
ទន្ទឹមគ្នានេះយុវជនអាចចូលរួមបង្ហាញសមត្ថភាពនិងសក្តានុពល របស់ខ្លួនដើម្បីដោះស្រាយបញ្ហាទឹកស្អាតនិងអនាម័យ ដូចជាការបង្កើតវិធីសាស្ត្រថ្មីៗដើម្បីដោះស្រាយទឹកស្អាត រកដំណោះស្រាយបញ្ហាទឹកស្អាតនិងអនាម័យសម្រាប់ជនជាតិដើមភាគតិចនិងអ្នកដែលរស់នៅតំបន់បរិស្ថានកំពុងប្រឈមជាដើម។ លីតា
