ឧបករណ៍ភ្លេងបុរាណខ្មែរជាតន្ត្រីរក្សាអត្តសញ្ញាណជាតិ និងបានថែរក្សាការពារប្រពៃណី ចង្វាក់បទភ្លេងបុរាណខ្មែរមកជាយូរមកហើយៗបានបន្តស្នាដៃដោយបានបង្កើតជាសិប្បកម្មផលិតឧបករណ៍ភ្លេងបុរាណនេះតាមរយៈស្នាដៃក្មេងជំនាន់ក្រោយដើម្បីរក្សាទុករាប់រយឆ្នាំបន្តទៀត។
យ៉ាងណាមិញនៅក្នុងស្រុកមានសិប្បកម្មផលិតឧបករណ៍ភ្លេងបុរាណនេះមាន ស្គរ តាខេ ពិណពាទ្យ រនាត ។ល។ មានតិចតួចណាស់ដូចជានៅខេត្តសៀមរាប និងខេត្តកំពង់ស្ពឺដែលមានសិប្បកម្មខ្មែរម៉ាច ម៉ុយ ស្ថិតនៅក្នុងឃុំព្រះស្រែ ស្រុកឧត្តុង្គ ខេត្តកំពង់ស្ពឺ ។ បើតាមបទសម្ភាសផ្ទាល់ជាមួយលោក ម៉ាច ម៉ុយ បានមានប្រសាសន៍ថាឧបករណ៍ភ្លេងបុរាណខ្មែរមានភ្លេងពិណពាទ្យ ឧបករណ៍ភ្លេងការ គងជ័យ ស្គរជ័យ ដោយឧបករណ៍ទាំងនេះផលិតចេញពីប្រភេទឈើខ្នុរភាគច្រើនដោយក្នុងមួយវង់អាចផលិតឧបករណ៍ភ្លេងនេះដោយប្រើរយៈពេល១ខែឯណោះ។
លោក ម៉ាច ម៉ុយ បន្តទៀតថា សិប្បកម្មឧបករណ៍ផលិតភ្លេងខ្មែរនេះកកើតឡើងជាង៣០ឆ្នាំមកហើយដោយប្រើប្រាស់កូនជាង១០នាក់ក្នុងនោះឧបករណ៍ភ្លេងបុរាណផលិតសម្រេចបានក្នុងមួយវង់អាចលក់បាន១២០០ដុល្លារ បើឧបករណ៍ភ្លេងដែលកម្ម៉ង់មានក្បូរក្បាច់ច្រើនអាចលក់បានតម្លៃ១៥០០ដុល្លារក្នុងមួយវង់។ចំពោះទីផ្សារមានការបញ្ជាកម្ម៉ង់ទិញទៅសហរដ្ឋអាមេរិកនិងទៅវៀតណាមដោយលក់ក្នុងស្រុកមួយឆ្នាំៗអាចលក់បានចំនួន២០ទៅ៣០វង់។ឧបករណ៍ភ្លេងបុរាណខ្មែរយើងដែលផលិតពីឈើខ្នុរអាចមានអាយុកាលចាប់ពី២៥ទៅ៣០ឆ្នាំ៕ កញ្ញា វ៉ាត
