ជារៀងរាល់ឆ្នាំឱ្យតែដល់ខែកក្កដា គឺជារដូវប្រមូលផលល្ងបន្ទាប់ពីកសិផលពោត ដំឡូងមី របស់ប្រជាកសិករក្នុងស្រុកក្រូចឆ្មា ខេត្តត្បូងឃ្មុំ ។
តាមការចំណាំទុកជារៀងរាល់ឆ្នាំប្រជាកសិករយើងក្នុងខែកក្កដាតែងប្រមូលផលបញ្ចប់ល្ងដោយកសិផលមួយនេះច្រើនដាំតាំងពីខែមេសារហូតដល់ខែកក្កដា ទើបបញ្ចប់ការប្រមូលផល។នេះជាការលើកឡើងរបស់ប្អូនស្រី សុផល រស់នៅក្នុងឃុំ រកាខ្នុរ ស្រុកក្រូចឆ្មា ខេត្តត្បូងឃ្មុំ បានបញ្ជាក់ឱ្យដឹងទៀតថាក្នុងខែកក្កដាជារដូវប្រមូលផលល្ងបន្ទាប់ពីកសិផលពោតក្រហមនិងដំឡូងមីមិនទាន់ប្រមូលផលនោះទេ។ប្អូនស្រីបន្តទៀតថា គ្រួសារប្អូនស្រីតែងដាំល្ងនិងពោតក្រហមជារៀងរាល់ឆ្នាំក៏ដោយសារតែកសិផលទាំងនេះងាយរកទីផ្សារដូចជា ល្ង ដែលដាំលើផ្ទៃដី១ហិកតាអាចបានផលពីចំនួន៣០០គីឡូក្រាមទៅ៤០០គីឡូក្រាមដោយក្នុងនោះលក់បាន១គីឡូក្រាមចាប់ពី៧០០០រៀលទៅ៨០០០រៀល។
យោងតាមរបាយការណ៍របស់លោក ស៊ុំ រ៉ា ប្រធានការិយាល័យកសិកម្មស្រុកក្រូចឆ្មាបានឱ្យដឹងទៀតថា ខែកក្កដានេះជារដូវបញ្ចប់ប្រមូលផលល្ងហើយដោយក្នុងនោះស្រុកក្រូចឆ្មាមានផ្ទៃដីដាំដុះល្ងបានចំនួន៣៤៥ហិកតានិងផ្ទៃដីដាំពោតក្រហមមានចំនួន៣១២៥ហិកតាដែលប្រមូលផលមិនទាន់រួចរាល់នៅឡើយទេនោះ៕ កញ្ញា វ៉ាត.
