ពូជស្រូវនាងអុំ ជាប្រភេទពូជស្រូវធ្ងន់ដែលអាចដាំបានក្នុងតំបន់ព្រៃភ្នំដូចជាខេត្តព្រះវិហារ កសិករយើងភាគច្រើននិយមធ្វើស្រែចម្ការនេះអាស្រ័យដោយសារពូជស្រូវមួយនេះធន់នឹងទឹកដីខេត្តព្រះវិហារ និងទទួលបានផលច្រើនជាងពូជស្រូវដទៃទៀត។
បងស្រី លៀម ដាន ជាកសិករធ្វើស្រែចម្ការនេះយូរឆ្នាំនេះមកហើយដោយប្រើប្រាស់ពូជនាងអុំទទួលបានផលជាទីគាប់ចិត្ត ក្នុងតំបន់នោះកសិករយើងក៏មានការប្រើប្រាស់នូវពូជស្រូវរំដួលផងដែរជាពូជស្រូវសម្រាប់ធ្វើការនាំចេញ។
បងស្រី លៀម ដាន បន្តទៀតថាការស្រែចម្ការនេះដោយប្រើពូជនាងអុំរយៈពេលវែងបន្តិចដោយចាប់ផ្តើមព្រោះស្រូវតាមចម្ការពីខែមេសារហូតដល់ខែវិច្ឆិកាទើបបានច្រូតកាត់ប្រមូលផល។
ឆ្នាំថ្មីនេះលើផ្ទៃដីចម្ការ២ហិកតាអាចទទួលបានផលប្រមាណជា៥០បេដោយក្នុងមួយបេមានទំង់ន់៧០គីឡូក្រាម ដោយឆ្នាំនេះទទួលបានផលច្រើនជាងឆ្នាំទៅ។ បងស្រី ដាន បន្ថែមទៀតថាពូជស្រូវនាងអុំនេះដាំបាយរសជាតិឈ្ងុយឆ្ងាញ់ណាស់ហេតុនេះហើយទើបប្រភេទពូជស្រូវនាងអុំមានតម្លៃលក់លើទីផ្សារក្នុង១គីឡូក្រាមថ្លៃ១២០០រៀលទៅ១៥០០រៀលដែលជាតម្លៃលក់ចេញប្រហាក់ប្រហែលទៅនឹងពូជស្រូវរំដួលផងដែរ។
ដោយឡែក ពូជស្រូវនាងអុំរើសដីបន្តិចដោយនៅពេលណាមានទឹកជាំច្រើនមិនដូចពូជស្រូវរំដួលទេវាមិនបានទទួលផលបានច្រើននោះទេក៏ដោយសារជាំទឹកច្រើនពេកវាត្រូវការទឹកល្មមទើបអាចទទួលបានទិន្នផលខ្ពស់៕
