ភ្នំពេញ ៖ មុខរបរដាំផ្កាម្លិះនេះបានកកើតឡើងជាង ២០មកហើយ ដោយកសិករយើងក្នុងភូមិកោះក្របី សង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ ដែលតែងតែដាំផ្កាម្លិះជារៀងរាល់ឆ្នាំ ដែលធ្វើឱ្យមុខរបរនេះ ផុលផុសច្រើន ដោយទទួលបានចំណូលជាប្រចាំថ្ងៃ ។
នៅក្នុងបទសម្ភាសន៍ជាមួយលោក វ៉ាន ជាកសិកររស់នៅក្នុងភូមិកោះក្របី បានឱ្យដឹងថា រូបលោកទើបនឹងដាំផ្កាម្លិះ មួយឆ្នាំប៉ុណ្ណោះ អាស្រ័យដោយសារគេដាំច្រើនឆ្នាំមកហើយ ម្យ៉ាងផ្កាម្លិះមានទីផ្សាររាល់ថ្ងៃផង ។ លោក វ៉ាន បន្តថា នៅក្នុងផ្ទៃដីទំហំមានទទឹង ២០ម៉ែត្របណ្តោយ ៣០ម៉ែត្រជាកម្មសិទ្ធិផ្ទាល់ខ្លួនអាចដាំបានចំនួន ៦០០ដើម ដោយចំណាយទុនជាង ១០០០ដុល្លារ ។ នៅពេលដើមផ្កាម្លិះទទួលបានផល អាចបេះបានរាល់ថ្ងៃ ដោយក្នុងមួយសីលម្តងៗ អាចទទួលបានចំណូលពី ៣០ម៉ឺន ទៅ ៤០ម៉ឺនរៀល ។ ទីផ្សារម្លិះនៅពេលបច្ចុប្បន្នបានថ្លៃ ក្នុងមួយគីឡូបាន ៥០០០០រៀល ចំពោះខែប្រាំង ដោយឡែកនារដូវវស្សាអាចបានថ្លៃរហូតដល់មួយគីឡូ ១៥ម៉ឺន ឬលើសនឹងទៅទៀត ។
ផ្កាម្លិះចែកចេញជាពីប្រភេទ គឺម្លិះរួត និងម្លិះលា ក៏ប៉ុន្តែចំពោះផ្កាម្លិះរួតកសិករយើងកម្រសូវដាំណាស់ភាគច្រើនដាំផ្កាម្លិះលាប៉ុណ្ណោះ ។ លោក វ៉ាន បន្ថែមទៀតថា ដំណាំផ្កាម្លិះត្រូវការថែទាំដូចដំណាំដទៃទៀត ដោយក្នុងមួយឆ្នាំៗត្រូវកាត់មែកចាស់ចោលចេញ ដើម្បីឱ្យមែកថ្មីលាស់ ឆាប់ចេញផ្កាទទួលបានផល ។ កញ្ញា វ៉ាត
