ក្រសួងអភិវឌ្ឍន៍ជនបទបានប្រារព្ធធ្វើសន្និបាតបូកសរុបលទ្ធផលការងារឆ្នាំ២០២១និងទិសដៅបន្តឆ្នាំ២០២២ថ្មីៗនេះឋិតក្រោមអធិបតីភាពឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ។
យោងតាមរបាយការណ៍របស់ក្រសួងអភិវឌ្ឍន៍ជនបទបានបង្ហាញឱ្យឃើញថាឆ្នាំ២០២២គឺជាឆ្នាំទី៤នៃការអនុវត្តផែនការយុទ្ធសាស្ត្រអភិវឌ្ឍន៍ជនបទ២០១៩-២០២៣ដែលក្រសួងអភិវឌ្ឍន៍ជនបទបានដាក់ចេញនូវគោលបំណងគោលនយោបាយចម្បងគឺ« ការលើកកម្ពស់គុណភាពនិងគុណតម្លៃនៃជីវិតរស់នៅរបស់ប្រជាជនជនបទប្រកបដោយបរិយាប័ន្ន ទាំងផ្នែកសេដ្ឋកិច្ច សង្គមនិងវប្បធម៌» និងបានកំណត់យកសរសរស្តម្ភ៤ដែលដើរតួជាកម្មវិធីអាទិភាពគឺ៖
ការអភិវឌ្ឍហេដ្ឋារចនាសម្ព័ន្ធរូបវ័ន្តនិងគមនាគមន៍ , ការកែលម្អលក្ខខណ្ឌនៃការរស់នៅរបស់សហគមន៍ជនបទ, ការធ្វើពិពិធកម្មសកម្មភាពសេដ្ឋកិច្ចជនបទ និងការពង្រឹងសេវាគាំទ្ររដ្ឋបាលនិងកិច្ចការទូទៅ។ទន្ទឹមនេះក្រសួងបានផ្តោតការយកចិត្តទុកដាក់លើការងារជាសារវ័ន្តចំនួន ៧គឺ ៖
១. កែលម្អស្ថានភាពសេដ្ឋកិច្ច សង្គមកិច្ច និងវប្បធម៌របស់ប្រជាជនជនបទ
២. កាត់បន្ថយជាបណ្តើរៗនូវភាពក្រីក្រនិងភាពខុសគ្នារវាងអ្នកជនបទនិងអ្នកទីក្រុង
៣. ជម្រុញការបណ្តុះបណ្តាលវិជ្ជាជីវៈបឋមសំដៅបើកទូលាយដល់ប្រជាពលរដ្ឋជ្រើសរើសមុខរបរថ្មីបន្ថែម
៤. លើកកម្ពស់ផលិតភាពនិងប្រាក់ចំណូល
៥. អភិវឌ្ឍន៍ជនបទប្រកបដោយចីរភាព
៦. កម្មវិធីអភិវឌ្ឍន៍ជនបទចម្រុះថ្នាក់គ្រួសារ ភូមិ ឃុំ ដូចជា អភិវឌ្ឍន៍ផ្លូវលំជនបទ, ការផ្គត់ផ្គង់ទឹកជនបទ, ការថែទាំសុខភាពបឋម , ការអភិវឌ្ឍសហគមន៍, និងការអភិវឌ្ឍសេដ្ឋកិច្ចជនបទ។
៧. ការពង្រឹងរចនាសម្ព័ន្ធអភិវឌ្ឍន៍ជនបទគ្រប់ជាន់ថ្នាក់។
ការអនុវត្តផែនការយុទ្ធសាស្ត្រអភិវឌ្ឍន៍ជនបទរយៈកាល៣ឆ្នាំកន្លងទៅនេះក្រសួងអភិវឌ្ឍន៍ជនបទ សម្រេចបានលទ្ធផលក្នុងឆ្នាំជាច្រើនគួរឱ្យកត់សម្គាល់ទោះជាស្ថិតក្នុងស្ថានភាពរីករាលដាលនៃជំងឺកូវីដ១៩ក៏ដោយ ហើយបាននិងកំពុងរួមចំណែកយ៉ាងសកម្មក្នុងការជម្រុញឱ្យមានការផ្លាស់ប្តូរជីវភាពរស់នៅរបស់ប្រជាជនជនបទប្រកបដោយបរិយាប័ន្នទាំងផ្នែកសេដ្ឋកិច្ច សង្គមកិច្ច វប្បធម៌ និងបរិស្ថាន។
ដើម្បីធានាសម្រេចឱ្យបាននូវសរសរស្តម្ភទាំង៤ និងការងារជាសារវ័ន្តទាំងអស់ខាងលើប្រកបដោយប្រសិទ្ធភាពនិងប្រសិទ្ធផលខ្ពស់ ក្រសួងអភិវឌ្ឍន៍ជនបទ បានកំណត់សូចនាករមេសំខាន់ៗចំនួន១១សម្រាប់ជាមូលដ្ឋានក្នុងការតាមដាន ត្រួតពិនិត្យ និងវាយតម្លៃលទ្ធផលសមិទ្ធកម្មប្រចាំឆ្នាំ២០២១រួមមាន៖ ជួសជុល និងថែទាំផ្លូវជនបទ ឱ្យបានប្រវែង៤ ១០២,៧០គ.ម , ស្ថាបនាពង្រីកវិសាលភាពនិងកែលម្អលើកកម្រិតផ្លូវជនបទឱ្យបានប្រវែង ៥០០គ.ម, អត្រាប្រជាជនទទួលបានសេវាផ្គត់ផ្គង់ទឹកស្អាតនៅជនបទ ឱ្យបានចំនួន៧៨% , អត្រាប្រជាជននៅជនបទទទួលសេវាអនាម័យល្អឱ្យបានចំនួន៨៤% , ត្រូវជម្រុញឱ្យបានយ៉ាងតិចមួយខេត្ត សម្រេចបានកម្មវិធីបញ្ឈប់ការបន្ទោបង់ពាសវាលពាសកាល(ODF) , បណ្តុះបណ្តាលវិជ្ជាជីវៈចល័តឱ្យបានយ៉ាងតិច៥ខេត្ត, បណ្តុះបណ្តាលជំនាញវិជ្ជាជីវៈមូលដ្ឋានជូនដល់ប្រជាពលរដ្ឋជនបទឱ្យបានចំនួន ១៥០០០នាក់ , ផ្តួចផ្តើមបង្កើត សហគ្រាសខ្នាតតូចជូនគ្រួសារប្រជាពលរដ្ឋក្រីក្របន្ទា
ប់ពីទទួលបានការបណ្តុះបណ្តាលឱ្យបានចំនួន ៣៥០សហគ្រាសក្នុងមួយគ្រួសារ , ពង្រឹងសមត្ថភាពមន្ត្រីរាជការក្រសួងឱ្យបានយ៉ាងតិច៨០ម៉ោងក្នុងមួយឆ្នាំ និងចំនួន៦០ម៉ោងក្នុងមន្ត្រីម្នាក់ , និងកំណត់អត្តសញ្ញាណជនជាតិដើមភាគតិចឱ្យបានចំនួន ១៧៣សហគមន៍។
យោងតាមរបាយការណ៍ក្នុងឆ្នាំ២០២១នេះ ក្រសួងអភិវឌ្ឍន៍ជនបទសម្រេចបានសមិទ្ធផលធំៗជាច្រើន និងបានរួមចំណែកយ៉ាងសំខាន់ក្នុងការអនុវត្តការងារកែទម្រង់ការគ្រប់គ្រងហិរញ្ញវត្ថុសាធារណៈ ពិសេសក្នុងដំណាក់កាលទី៣ គឺការផ្សារភ្ជាប់ថវិកាទៅនឹងគោលនយោបាយ ក្នុងនោះក្រសួងបានបង្កើតគណៈកម្មាធិការគោលនយោបាយ និងថវិកាដែលមាន ឯកឧត្តមបណ្ឌិតសភាចារ្យរដ្ឋមន្ត្រី ជាប្រធានតាមសេចក្តីសម្រេចលេខ ១២០/២១ ក.អ.ជ.សសរ ចុះថ្ងៃទី ៣ ខែសីហា ឆ្នាំ២០២១របស់ក្រសួងអភិវឌ្ឍន៍ជនបទ និងបានរៀបចំធ្វើបច្ចុប្បន្នភាពគោលនយោបាយក្រសួងឱ្យក្លាយជាគោលនយោបាយជាតិអភិវឌ្ឍន៍ជនបទឆ្នាំ២០២១-២០២៣ ដោយកំណត់យកចក្ខុវិស័យ «កសាងសង្គមជនបទស៊ីវីល័យឆ្នាំ២០២៣» និងមានគោលនយោបាយអាទិភាពចំនួនពីរ។ស្តែងចេញពីគោលនយោបាយខាងលើ ក្រសួងបានរៀបចំផែនការវិនិយោគសាធារណៈបីឆ្នាំរំកិលឆ្នាំ ២០២១-២០២៣ដោយសម្រេចបានគម្រោងវិនិយោគសរុបចំនួន ៤០គម្រោង ដែលមានទឹកប្រាក់សរុបចំនួន ៤៦៣ ១៦៩ ៨០០ ដុល្លារអាមេរិក សម្រាប់រយៈពេល៣ឆ្នាំ ( ២០២១-២០២៣ ) ដោយក្នុងនោះគម្រោងកំពុងដំណើរការមានចំនួន១១គម្រោង មានទឹកប្រាក់សរុបចំនួន ៣៧០ ៩៤៨ ៩០០ ដុល្លារអាមេរិក សម្រាប់ឆ្នាំ២០២១-២០២៣ និងទឹកប្រាក់ចំនួន ១១២ ៦៧៥ ៦០០ ដុល្លារអាមេរិក សម្រាប់ឆ្នាំ២០២១, គម្រោងជំនួយបច្ចេកទេសកំពុងដំណើរការមានចំនួន៧គម្រោង ដែលមានទឹកប្រាក់សរុបចំនួន ៩ ៨៦០ ៩០០ ដុល្លារអាមេរិក សម្រាប់ឆ្នាំ២០២១-២០២៣ និងទឹកប្រាក់ចំនួន ៣ ២៦៣ ១០០ ដុល្លារអាមេរិក សម្រាប់ឆ្នាំ២០២១, និងគម្រោងអនុវត្តផែនការយុទ្ធសាស្ត្រអភិវឌ្ឍន៍ជាតិមានចំនួន ២២គម្រោង។ គម្រោងវិនិយោគសាធារណៈ (PIP) គឺជាគម្រោងជំនួយហិរញ្ញប្បទានពីដៃគូអភិវឌ្ឍន៍នានារួមមាន៖ ទេ្វរភាគី និងពហុភាគី។ គម្រោងវិនិយោគទាំងនេះបានជួយជម្រុញការអភិឌ្ឍនៅតំបន់ជនបទឱ្យមានសន្ទុះយ៉ាងលឿន ពិសេសបានរួមចំណែកអភិវឌ្ឍន៍លើផ្នែកហេដ្ឋារចនាសម្ព័ន្ធរឹងនិងទន់ និងលើកកម្រិតជីវភាពរស់នៅរបស់ប្រជាជនជនបទបានល្អប្រសើរឡើងជាបន្តបន្ទាប់។
ជាមួយគ្នានេះ ក្រសួងបានយកចិត្តទុកដាក់រៀបចំផែនការយុទ្ធសាស្ត្រថវិកាឆ្នាំ២០២២-២០២៤ ដោយបានធ្វើសមាហរន្តកម្មថវិកាវិនិយោគ និងថវិកាចរន្តបញ្ចូលគ្នាតាមកម្មវិធី អនុកម្មវិធី ដោយរក្សាគម្លាតថវិការវាងថវិកាកម្មវិធី និងផែនការយុទ្ធសាស្ត្រថវិកាចំនួន ១០,៨% ដែលក្នុងនោះផែនការយុទ្ធសាស្ត្រថវិកាឆ្នាំ២០២១-២០២៣ គ្រោង ៣០៨ ៤៦៧,១០ លានរៀល ខណៈផែនការថវិកាឆ្នាំ២០២១មានចំនួន ៣៣៤ ៣៥៥លានរៀល ដែលអាចឆ្លើយតបបាននឹងកំណែទម្រង់ការគ្រប់គ្រងហិរញ្ញវត្ថុសាធារណៈ ដែលបានកំណត់ក្នុងរង្វង់ ១០%។ ទន្ទឹមនេះ ក្រសួងបានរៀបចំសៀវភៅគោលការណ៍ណែនាំការគ្រប់គ្រងថវិកាកម្មវិធី និងអនុកម្មវិធីឆ្នាំ ២០២១ ដើម្បីផ្តល់នូវការអនុវត្តថវិកាឱ្យមានប្រសិទ្ធភាប និងស័ក្តិសិទ្ធភាព រក្សាបានតុល្យភាពនៃការលំហូរសាច់ប្រាក់ និងធានានិរន្តភាពការអនុវត្តផែនការសកម្មភាពពីដើមឆ្នាំដល់ចុងឆ្នាំ។ ក្នុងការវិភាជន៍កញ្ចប់ថវិកាប្រចាំឆ្នាំ ក្រសួងបានបង្កើតក្រុមការងារថវិកាដើម្បីផ្តល់ការណែនាំ រៀបចំ និងបែងចែកកញ្ចប់ថវិកាទៅតាមកម្មវិធីអាទិភាបនីយមួយៗរបស់ក្រសួង។
ថវិកាឆ្នាំ ២០២១ក្រសួងទទួលបានចំនួន ៣៣៤ ៣៥៥ លានរៀល ដោយបានបែងចែកទៅកម្មវិធីទី១ ស្តីពីការអភិវឌ្ឍហេដ្ឋារចនាសម្ព័ន្ថ រូបវ័ន្ត និងគមនាគមន៍ ចំនួន ២៦៧ ៥៩៩ លានរៀល ស្មើនឹង ៨០% សម្រាប់រៀបចំផ្លូវជនបទក្នុងប្រទេសកម្ពុជា , កម្មវិធីទី២ ស្តីពីការកែលម្ពលក្ខខណ្ឌនៃការរស់នៅរបស់សហគមន៍ជនបទ ចំនួន១១ ៣៤៧,៦លានរៀល ស្មើនឹង ៣,៣៩% សម្រាប់លើកកម្ពស់សុខភាពអនាម័យជនបទឱ្យបានប្រសើរ។
របាយការណ៍បានបញ្ជាក់ទៀតថាជារួម ទោះស្ថិតក្នុងស្ថានភាពរាតត្បាតនៃជំងឺកូវីដ១៩ និងគ្រោះទឹកជំនន់ក៏ដោយ ក៏ក្រសួងអភិវឌ្ឍន៍ជនបទ នៅតែអាចជំនះបាននូវរាល់ការប្រឈម និងផលលំបាកនានាក្នុងការអនុវត្តផែនការប្រចាំឆ្នាំបានដោយជោគជ័យតាមការគ្រោងទុក។ លទ្ធផលដែលសម្រេចបានខាងលើនេះ គឺអាស្រ័យលើកត្តាសុខសន្តិភាប ស្ថិរភាពនយោបាយ សណ្តាប់ធ្នាប់សង្គមដោយមានការគាំទ្រ និងចូលរួមយ៉ាងពេញទំហឹងក្រោមការដឹកនាំប្រកបដោយគតិបណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ដែលបានដាក់ចេញនូវចក្ខុវិស័យ កម្មវិធីនយោបាយ និងយុទ្ធសាស្ត្រចតុកោណដំណាក់កាលទី៤ ដ៏ត្រឹមត្រូវច្បាស់លាស់ និងឆ្លើយតបចំគោលដៅទៅនឹងសំណូមពររបស់ប្រជាពលរដ្ឋនិងលើកកម្ពស់ឧត្តមប្រយោជន៍ជាតិ។ លទ្ធផលទាំងនេះ ក៏ឆ្លុះបញ្ចាំងនូវកិច្ចខិតខំប្រឹងប្រែង និងសាមគ្គីភាពផ្ទៃក្នុងរឹងមាំរបស់ក្រសួងអភិវឌ្ឍន៍ជនបទ នៅគ្រប់ថ្នាក់ គ្រប់ផ្នែក ការគាំទ្រ និងសហការជាមួយក្រសួង ស្ថាប័នដៃគូអភិវឌ្ឍន៍ អង្គការសង្គមស៊ីវិល រដ្ឋបាលថ្នាក់ក្រោមជាតិ អាជ្ញាធរដែនដីគ្រប់ថ្នាក់ ការគាំទ្រ និងការចូលរួមពីសំណាក់ប្រជាពលរដ្ឋនៅគ្រប់មជ្ឈដ្ឋានក្នុងសង្គម។
ដោយផ្អែកលើលទ្ធផលជាស្នាដៃខាងលើនេះ និងដោយមានកត្តារួមផ្សំជាច្រើនដែលបង្កនូវជំនឿជឿជាក់យ៉ាងមុតមាំផងនោះ នៅឆ្នាំ២០២២ខាងមុខនេះ ក្រសួងនឹងប្តេជ្ញាបន្តកែលម្អគោលនយោបាយជាតិអភិវឌ្ឍន៍ជនបទ ឆ្នាំ២០២១-២០២៣ ផែនការយុទ្ធសាស្ត្រថវិកា ២០២៣-២០២៥ ផែនការថវិកាឆ្នាំ២០២៣ ស្របតាមគោលនយោបាយថ្មី ដើម្បីបង្កើនផលិតភាព ប្រសិទ្ធភាពនៃការគ្រប់គ្រង និងអនុវត្តថវិកា ធានាដោះស្រាយបញ្ហានិងការប្រឈមនានា ជូនប្រជាពលរដ្ឋជនបទឱ្យកាន់តែសកម្ម សំដៅរួមចំណែកប្រែក្លាយប្រទេសកម្ពុជាជាប្រទេសដែលមានប្រាក់ចំណូលមធ្យមកម្រិតខ្ពស់ឆ្នាំ២០២៣ និងជាប្រទេសមានប្រាក់ចំណូលខ្ពស់ឆ្នាំ២០៥០៕
