ត្បិតតែមានការដាំដុះស្វាយចន្ទីច្រើនរបស់ប្រជាពលរដ្ឋតាមបណ្តាខេត្តមួយចំនួនមាន ខេត្តកំពង់ចាម កំពង់ធំ សៀមរាប ព្រះវិហារ ប៉ៃលិន ឧត្តរមានជ័យ ក្រចេះ ស្ទឹងត្រែង រតនគិរី មណ្ឌលគិរី ។ដោយឡែកចំពោះការកែច្នៃគ្រាប់ស្វាយចន្ទីនៅមានកម្រិតនៅឡើយដោយសារតែខ្សែចង្វាក់ផលិតកម្មក្នុងស្រុកមានការផលិតតិចតួចគ្រាន់តែលក់ក្នុងស្រុកបានត្រឹមតែ១០ភាគរយប៉ុណ្ណោះ ចំណែកផលិតកម្មមិនទាន់កែច្នៃគ្រាប់ស្វាយចន្ទីមានរហូតដល់៩០ភាគរយ នេះយោងតាមរបាយការណ៍ 0pen development Cambodian បានផ្សាយ។
ថ្មីៗកន្លងទៅនេះ ក្រសួងជំនាញបានបង្កើតឡើង បានយកចិត្តទុកដាក់ក្នុងការជម្រុញក្នុងការដាំដុះស្វាយចន្ទីឱ្យបាន១លានតោនក្នុងឆ្នាំ២០២៩ខាងមុខ។ ទាក់ទិនទៅនឹងការដាំដុះស្វាយចន្ទីសូមលើកយកបទពិសោធន៍របស់សហគ្រាសខ្នាតតូចមួយដែលមានទីតាំងនៅក្នុងស្រុកចំការលើ ខេត្តកំពង់ចាម ដែលធ្វើការដាំដុះដោយខ្លួនឯងនិងបានធ្វើការកែច្នៃគ្រាប់ស្វាយចន្ទីដោយខ្លួនឯងផងដែរ។ ជួបជាមួយនឹងម្ចាស់សហគ្រាស ឡឹង ម៉ានុត បានឆ្លើយនឹងសំណួរអ្នកយកព័ត៌មានយើងថា៖
សំណួរ៖ _ តើសហគ្រាសនេះបានដាំស្វាយចន្ទីបានប៉ុន្មានហិកតា ? នៅឯណា ?
ឡឹង ម៉ានុតៈ_ ចា៎ស ! ប៉ាខ្ញុំដាំស្វាយចន្ទីនេះលើផ្ទៃដីចំនួន ១០ហិកតានៅក្នុងភូមិតាអុង ស្រុកចំការលើ ខេត្តកំពង់ចាម។
សំណួរ៖ _ តើពេលបច្ចុប្បន្ននេះស្វាយចន្ទីឱ្យផលបានប៉ុន្មានក្នុង១ហិកតា ?តើត្រូវប្រើប្រាស់ពូជអ្វីដែលទទួលបានទិន្នផលខ្ពស់ ? ហើយបើដាំដុះវិញត្រូវប្រើរយៈពេលប៉ុន្មានឆ្នាំ ?
ឡឹងម៉ានុតៈ_ បច្ចុប្បន្ននេះស្វាយចន្ទីឱ្យផលបានក្នុង១ហិកតាមានចំនួន១តោនឬលើស១តោនបន្តិចបន្តួចប៉ុណ្ណោះ។ ក្នុងនោះស្វាយចន្ទីប្រើប្រាស់ពូជ M23ឬ 09 ដែលជាពូជប្រជាកសិករយើងប្រើប្រាស់ច្រើនដោយពូជស្វាយចន្ទីនេះអាចដាំដុះបាននិងទទួលផលចាប់ពី២ឆ្នាំឡើង។
សំណួរ៖ _ តើការកែច្នៃគ្រាប់ស្វាយចន្ទីចម្អិនលក់ចេញក្នុងតម្លៃណាខ្លះ ?
ឡឹង ម៉ានុតៈ_ ចា៎ស ! ក្នុងការកែច្នៃគ្រាប់ស្វាយចន្ទីចម្អិនមានការវេចខ្ចប់ត្រឹមត្រូវជាកំប៉ុង ជាកញ្ចប់ ដោយក្នុង១គីឡូក្រាមតម្លៃ ៧ម៉ឺនរៀល ដូចគ្នាទៅនឹងគ្រាប់ស្វាយចន្ទីចម្អិនទាំងសំបកនិងបកសំបកហើយ។បញ្ជាក់ជូនថាតម្លៃលក់ចេញគ្រាប់ស្វាយចន្ទីកែច្នៃនេះនៅដដែលពុំមានការតម្លើងថ្លៃនោះទេសម្រាប់តម្រូវការទទួលទានរបស់បងប្អូនយើងក្នុងស្រុក។
សំណួរ៖_ តើការកែច្នៃស្វាយចន្ទីនេះមានទីផ្សារនាំចេញ ឬទីផ្សារក្នុងស្រុកនៅឯណាខ្លះ ?
ឡឹង ម៉ានុតៈ_ ចា៎ស ! ចំពោះស្វាយចន្ទីចម្អិនរួចនេះ ភាគច្រើនជនជាតិចិននិយមទទួលទានហើយបើនៅក្នុងស្រុកគឺលក់តាមបណ្តាញបន្តនៅតាមផ្សារដូចជាផ្សារម៉ាតធំៗជាដើម។ការផលិតចំណេញតិចអាចចំណេញបានតែ២ភាគរយប៉ុណ្ណោះហើយអ្នកលក់បន្តអាចចំណេញច្រើនពី១០ទៅ២០ភាគរយ។
សំណួរ៖_ សហគ្រាសនេះដំណើរការយូរមកហើយ តើគិតថានឹងមានគម្រោងពង្រីកការដាំដុះបន្តទៀតដែរឬទេ?
ឡឹង ម៉ានុតៈ_ ចំពោះការដាំដុះបន្ថែមទៀតសហគ្រាសនាងខ្ញុំពុំមានគម្រោងពង្រីកការដាំដុះបន្តទៀតនោះឡើយក៏ព្រោះតែពុំមានដើមទុនចំណាយ។ដោយបច្ចុប្បន្ននេះ សហគ្រាសឡឹង ម៉ានុត ត្រូវដើរប្រមូលទិញគ្រាប់ស្វាយចន្ទីល្អៗដោយជ្រើសរើសនៅតាមបណ្តាភូមិដែលជាគ្រាប់ស្វាយចន្ទីដាំដុះពីធម្មជាតិមិនប្រើប្រាស់ជាតិគីមីនោះឡើយ។
សំណួរ៖_ រហូតមកដល់ពេលនេះ ខ្សែចង្វាក់ផលិតកម្មសហគ្រាសអាចផលិតគ្រាប់ស្វាយចន្ទីកែច្នៃបានប៉ុន្មានដែរ?
ឡឹង ម៉ានុតៈ_ បើទោះជាមានជំងឺកូវីដ១៩កើតឡើងមួយរយៈមកនេះក៏ផលិតកម្មស្វាយចន្ទីនៅតែលក់ដាច់ក្នុងស្រុកដដែល ដោយហក់ឡើង៥ភាគរយក្នុងការលក់ចេញហើយការលក់ចេញនេះតម្រូវទៅតាមការកម្ម៉ង់របស់អតិថិជនដែលចង់បាន៥០គីឡូក្រាមឬ១០០គីឡូក្រាម។
សំណួរ៖_តើសហគ្រាសឡឹង ម៉ានុតមានចំណាប់អារម្មណ៍យ៉ាងណាដែរចំពោះការគិតគូរការយកចិត្តទុកដាក់ខ្ពស់ក្នុងការជម្រុញការដាំដុះស្វាយចន្ទីរបស់កសិករយើងក្នុងការនាំចេញឱ្យបាន១លានតោននាឆ្នាំ២០២៩?
ឡឹង ម៉ានុតៈ_ ចា៎ស ! ខ្ញុំរីករាយណាស់នៅពេលដែលក្រសួងគិតគូរខ្ពស់ដល់អ្នកដាំស្វាយចន្ទីរួមទាំងអ្នកផលិតកម្មព្រោះកន្លងមកក្រសួងកសិកម្មតែងបើកនូវពិព័រណ៍ក្នុងស្រុកជួយផ្សព្វផ្សាយឱ្យអ្នកលក់ និងម្យ៉ាងទៀតពិនិត្យនៅក្នុងស្ថានភាពស្រុកចំការលើ ពុំសូវអ្នកសម្បូរផលិតការកែច្នៃគ្រាប់ស្វាយចន្ទីនេះច្រើននៅឡើយទេ៕
