ពោតក្រហមជាចំណីសត្វដែលមានទីផ្សាររាល់ឆ្នាំរយៈ៥ឆ្នាំជាប់គ្នានេះ។ តម្លៃពោតក្រហមមិនធ្លាក់ថ្លៃពេកនោះទេដោយឆ្នាំនេះពោតក្រហមហក់ឡើងបន្តិចដែលបណ្តាឆ្នាំកន្លងមកធ្លាប់តែលក់ចេញបានតម្លៃពី៧០០រៀលទៅ៨០០រៀលក្នុងមួយគីឡូក្រាមដោយឆ្នាំ២០២២នេះ ពោតក្រហមបានថ្លៃចាប់ពី១០២០រៀលដល់១០៥០រៀលក្នុង១គីឡូក្រាម។
តាមរយៈការផ្តល់បទសម្ភាសលោក ស៊ុំ រ៉ា ប្រធានការិយាល័យស្រុកក្រូចឆ្មារ បានផ្តល់បទសម្ភាសដល់អ្នកព័ត៌មានយើងថាលើផ្ទៃដីសរុបក្នុងនោះរដូវវស្សាមានចំនួន៦៨៥០ហិកតានិងដីរដូវប្រាំងមានចំនួន៤៥០០ហិកតា។ លោកបន្តថា បន្ទាប់ពីដំណាំស្រូវ ដំណាំដែលលេចធ្លោជាងគេគឺមានដំឡូងមី ដោយដំឡូងមីអាចលក់បានពី៣៥០រៀលទៅ៤០០រៀលក្នុង១គីឡូក្រាមអស់រយៈ៥ឆ្នាំជាប់ៗគ្នា។ បន្ទាប់មកពោតក្រហមដែលធ្លាប់ឆ្នាំទៅលក់បាន៧០០រៀលទៅ៨០០រៀលក្នុង១គីឡូក្រាម។
ក្នុងនោះកសិករឈ្មោះ យិន រស់នៅក្នុងឃុំព្រៃចាម ស្រុកក្រូចឆ្មារ ខេត្តត្បូងឃ្មុំដែលធ្លាប់ដាំពោតក្រហមបានឱ្យអ្នកយកព័ត៌មានដឹងថា គ្រួសារគាត់ដាំពោតក្រហម និងថ្នាំជក់អស់រយៈកាល៥ឆ្នាំហើយ ដោយដាំពោតលើផ្ទៃដីចំនួន២ហិកតាក្នុង១ហិកតាអាចទទួលបានទិន្នផល១០តោនចំពោះពោតក្រហម។ លោក យិន បន្តថា ពោតក្រហមធ្លាប់តែមានតម្លៃ៧០០រៀលទៅ៨០០រៀល ក៏ប៉ុន្តែឆ្នាំនេះតម្លៃពោតក្រហមក្នុងទីផ្សារ១០២០រៀលទៅ១០៥០រៀល។ លោក យិន មានមោទនភាពក្រៃលែងនៅពេលដែលពោតក្រហមមានតម្លៃខ្ពស់។
លោក ប្រធានការិយាល័យស្រុកក្រូចឆ្មារ ខេត្តត្បូងឃ្មុំ បានបញ្ជាក់ទៀតថា ក្រៅពីដំឡូងមី ពោតក្រហម និងថ្នាំជក់កសិករយើងក្នុងស្រុកក្រូចឆ្មារ នៅមានដាំដំណាំបន្ទាប់បន្សំ ល្ង សណ្តែក និងដាំបន្លែចម្រុះដែលជាតម្រូវការទីផ្សារផងដែរ៕
