រូបសំណាកព្រះថោង នាងនាគបានចារទុកក្នុងពង្សាវតាខ្មែរដែលជាម្ចាស់ទឹកដីដំបូងបង្អស់នៃគ.សក្នុងគ្រាកទឹកកដីដែលជាដែនដីនគរគោកធ្លក និងត្រូវបានកសាងជារូបសំណាកពីស្ពាន់ដ៏ធំសម្បើមតម្កល់ក្នុងភូមិគគីរ ឃុំបិតត្រាំង ស្រុកព្រៃនប់ ខេត្តព្រះសីហនុ ត្រង់ចំណុចគ្នារវាងមហាវិថីឆ្នេររាម និងមហាវិថីជំទាវម៉ៅ ដោយរៀបចំពិធីអភិសេករូបសំណាកកាលពីថ្ងៃឡើងស័កចូលឆ្នាំថ្មីកន្លងទៅថ្មីៗនេះ ឋិតក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានិងសម្តេចកិត្តិព្រឹទ្ធបណ្ឌិតប៊ុន រ៉ានី ហ៊ុន សែន ។
តាមរយៈការផ្តល់បទសម្ភាសពីក្រុមជំនាញកសាងរូបសំណាកនេះផ្តល់ឱ្យអ្នកយកព័ត៌មានដឹងថា រូបសំណាកព្រះថោង នាងនាគពីស្ពាន់នេះប្រើរយៈពេលជិត៣ខែ ដោយការតាក់តែងនិងតម្លើងស្រ៊ីឌី ក្បូរក្បាច់រចនាឱ្យមានភាពរស់រវើក។
តំណាងក្រុមជំនាញបន្តថា នៅពេលដែលយើងអនុម័តហើយ យើងខំរកទម្រង់ក្បាច់ដែលឱ្យមានភាពរស់រវើកទើបប្រើពេលយូរដោយគូរជាដៃហើយយើងរកកន្លែងចាក់ពុម្ពដោយខ្ញុំសូមបញ្ជាក់ថា មានបងប្អូនយើងមួយចំនួនគាត់សួរថាចិនឬក៏ខ្មែរជាអ្នកធ្វើ ខ្ញុំសូមបញ្ជាក់ផងដែរថា រូបសំណាកនឹងពុំមែនចិនជាអ្នកធ្វើនោះទេគឺខ្មែរអ្នកធ្វើដោយយើងដាក់ក្នុងស្រ៊ីឌីទាំងអស់។ ខ្ញុំសូមបញ្ជាក់ថាលើក្បាច់ក្បូរនឹងក្រៅពីខ្មែរយើងពុំមានអ្នកណាធ្វើបានឡើយគឺជាក្បាច់មករ ជាក្បាច់ដូនតាយើង។នៅពេលដែលយើងធ្វើម៉ូឌែលស្រ៊ីឌីហើយខ្មែរយើងស្វែងរករោងចក្រធំសម្រាប់ស្លស្ពាន់ចាក់រូបបដិមាធំ ដូច្នេះយើងត្រូវរកបដិមាករស្ពាន់ច្រើន អញ្ចឹងទើបបញ្ចូលស្រ៊ីឌីទៅព្រីមនៅស្រុកចិនចាក់ពុម្ព យើងយកជាទម្រង់ខ្មែរទាំងអស់ ស្រ៊ីឌីយើងមានបង្ហាញមកខ្មែរជាលក្ខណៈបច្ចេកទេសមួយដែលយើងកសាងបដិមាធំមានចាក់ជាស្ពាន់។
អ្នកតំណាងជំនាញដដែលនោះបន្តទៀតថា ការកសាងរូបសំណាកនេះប្រើរយៈពេលជិត៣ខែដោយនៅខាងលើមានរៀបចំបល្ល័ង្គកម្ពស់៧ម៉ែត្រដោយចាប់ពីចុងមកុដរហូតដល់ព្រះបាតជើងមានកម្ពស់២១ម៉ែត្រ និងមានទម្ងន់ស្ពាន់សុទ្ធ៦០តោនដែលជាចម្លាក់ធំជាងគេក្នុងស្រុកខ្មែរយើង។
ក្នុងឱកាសប្រារព្ធពិធីអភិសេករូបសំណាកព្រះថោង នាងនាគផងដែរ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជាបានថ្លែងការកោតសរសើរចំពោះឯកឧត្តម ឧបនាយករដ្ឋមន្ត្រី ជា សុផារ៉ា និងក្រុមការងារទាំងអស់ដែលបានរៀបចំរូបសំណាកព្រះថោងតោងស្បៃនាងនាគ នៅខេត្តព្រះសីហនុ នាពេលនេះដែលជាផ្នែកមួយនៃការទាក់ទាញពីសំណាក់ភ្ញៀវទេសចរជាតិ និងអន្តរជាតិបន្ថែមទៀតនៅលើទឹកដីនៃខេត្តព្រះសីហនុនេះ។ សម្តេចតេជោនាយករដ្ឋមន្ត្រីបានមានប្រសាសន៍ទៀតថាក្រុងព្រះសីហនុ ជាក្រុងមួយដែលបង្កើតឡើងដោយអតីតព្រះមហាវីរក្សត្រ សម្តេចព្រះនរោត្តសីហនុ ព្រះបរមរតនកោដ្ឋ ដែលក្នុងនោះមានរូបតំណាងព្រះនាមព្រះអង្គនៅរង្វង់មូលតោពីរស្រាប់តែម្តង។ ទាក់ទង់ទៅនឹងរូបសំណាកព្រះថោងនាងនាគនេះ សម្តេចតេជោ ហ៊ុន សែន បានរំលឹកអំពីដើមកំណើតនៃប្រពៃណីព្រះថោងតោងស្បៃនាងនាគ ដែលមានការផ្សារភ្ជាប់នូវអរិយធម៌ វប្បធម៌របស់ខ្មែរយើង ជាពិសេសទំនៀមទម្លាប់ប្រពៃណីក្នុងការៀបអាពាហ៍ពិពាហ៍ដែលតែងតែផ្សារភ្ជាប់ព្រះថោងនាងនាគ ជាពិសេសទំនៀមទម្លាប់ប្រុសចូលដណ្តឹងស្រី ដែលកើតមាមានតាំងពីបុរាណកាលមកម្ល៉េះ។ សម្តេចតេជោ បានមានប្រសាសន៍ថាការសាងសង់រូបសំណាក់នេះមិនត្រឹមតែបង្ហាញអំពីអរិយធម៌ វប្បធម៌ដ៏ល្អផូផង់របស់កម្ពុជាប៉ុណ្ណោះទេ ប៉ុន្តែវាបានទាក់ទាញពីសំណាកភ្ញៀវទេសចរជាតិ និងអន្តរជាតិផងដែរ ស្របពេលដែលខេត្តព្រះសីហនុ បានកសាងនូវហេដ្ឋារចនាសម្ព័ន្ធ ផ្លូវចំនួន៣៧ខ្សែ និងហេដ្ឋារចនាសម្ព័ន្ធរូបវ័ន្តសំខាន់ៗជាច្រើនទៀតនោះ។
តាមការដំណាលរឿងព្រះថោងនាងនាគ បានលើកមកនិទានថា ដោយហេតុតែក្តីស្រឡាញ់ស្មោះស្ម័គ្រព្រះថោងតស៊ូតោងស្បៃនាងនាគ ដើម្បីជ្រែកទឹកជ្រែកដីទៅតាមនាងនាគទៅឋានភុជង្គនាគប្រាថ្នានឹងរៀបអភិសេកជាគូគ្រងទៅអនាគត។ នៅពេលមុនចុះទៅឋានភុជង្គនាគ ព្រះនាងនាគបានឱ្យស្វាមីតោងស្បៃខាងក្រោយឱ្យជាប់ដោយគ្រាន់តែបិទព្រះនេត្រតែមួយភ្លែតនឹងទៅដល់ឋានភុជង្គនាគដូចប្រាថ្នា។
ដើមចមនៃរឿងព្រះថោងនាងនាគ បានបង្ហាញពីការកទឹកកដីនាសម័យគោកធ្លកហើយការតោងស្បៃនាងនាគបានក្លាយទៅជាប្រពៃណីទំនៀមទម្លាប់ខ្មែររហូតមកដែលមាននៅក្នុងពិធីមង្គលការដោយកូនកំលោះតោងស្បៃកូនក្រមុំចូលបន្ទប់ផ្សំដំណេក។
តាប៉ក់ វ័យ៦៥ឆ្នាំរស់នៅក្នុងស្រុកព្រៃនប់ ខេត្តព្រះសីហនុ ក៏មានចំណាប់អារម្មណ៍ថា រូបសំណាកព្រះថោងនាងនាគបានក្លាយជាប្រវត្តិសាស្ត្រវប្បធម៌មួយបង្ហាញដល់កូនខ្មែរជំនាន់ក្រោយឱ្យស្គាល់ពីតម្លៃវប្បធម៌ និងបង្ហាញដល់ភ្ញៀវបរទេសដឹងថាកូនខ្មែរពិតជាអាចធ្វើបាន។
និស្សិតចាន់ឋានៈ បញ្ចប់បរិញ្ញាបត្រសកលវិទ្យាល័យភូមិន្ទនិតិសាស្ត្រនិងវិទ្យាសាស្ត្រថា រូបសំណាកព្រះថោងនាងនាគ ខ្ញុំសង្កេតឃើញថាតំណាងឱ្យខ្មែរយើងដែលយើងឃើញក្នុងព្រេងនិទានដោយព្រះថោងតោងស្បៃនាងនាគមុជទឹកទៅឋានភុជង្គនាគដើម្បីរៀបអភិសេក។ និស្សិត ចាន់ឋានៈបន្តទៀតថា រឿងនេះបង្ហាញពីការកទឹកកដីដំបូងបង្អស់ហើយទំនៀមទម្លាប់ខ្មែរយើងទទួលបានតាំងពីសម័យនោះរហូតដល់សព្វថ្ងៃនេះ។
ទីកន្លែងរូបសំណាកព្រះថោងនាងនាគ បានក្លាយជាចំណាប់អារម្មណ៍ពីសំណាកភ្ញៀវគ្រប់ជាតិសាសន៍មកទស្សនាកម្សាន្តដោយពេលខ្លះមានអ្នកទស្សនារៀនធ្វើត្រាប់តាមរូបសំណាកព្រះថោងនាងនាគដោយមានបុរសដើរពីក្រោយតោងស្បៃស្ត្រីធ្វើឱ្យផ្ទុះសំណើចក្អាកក្អាយក្រៃលែងនៅពេលដែលធ្វើត្រាប់តាមទោះខុសឬត្រូវក៏ធ្វើឱ្យចិត្តរីករាយសប្បាយផងដែរ។ បើសង្កេតមើលរូបសំណាកព្រះថោងនាងនាគ ក្នុងគ្រាថ្ងៃលិច ឬក្នុងគ្រាចុះអ័ព្ទយើងឃើញរូបនេះហាក់អណ្តែតចុះទៅមាត់សមុទ្រដូចទេពនិមិ្មត៕ វ៉ាត.
